Nafarroako Gobernuak gure komunitatea nazioartekotzeko konpromisoa dauka; horregatik, Nafarroara kanpoko inbertsioa erakartzeko eta sendotzeko enkargua eman dio Sodenari.

Invest in Navarrak estrategia proaktibo bat gidatzen du enpresa-inbertsioa erakartzeko, proiektuak ekartze aldera eta gure komunitatean errazago ezartze aldera. Horretarako, Nafarroarako aberastasuna sortzeko ahalmen handiena duten sektoreetara bideratzen du bere jarduera, bai Nafarroako ekoizpen-sarearen indarguneengatik, bai beste sektore batzuetan duen bultzada-efektuagatik: zehazki, nekazaritzako elikagaien sektorean, automobilgintzan, osasunean, energia berriztagarrietan, eta informazioaren eta komunikazioaren teknologietan.
Horretarako, Invest in Navarrak neurrirako irtenbideak eskaintzen dizkie eskualdean interesa duten talde inbertitzaileei; zehazki, aholkularitza eta laguntza arloko zerbitzu sorta zabala du, Nafarroan ezartzeko erabakia hartzeko prozesuan inbertitzaileek dituzten behar guztiak betetze aldera. Zerbitzu horiek pertsonalizatuak dira eta honakoa barnebiltzen dute: kokapen egokiak bilatzea, Nafarroako negozio-ingurunearen kalitateari eta kostuari buruzko informazioa, eskualdera bisitak antolatzea eta ezarpen-fasean laguntzea.
Gainera, 2009. urteaz geroztik, alor horrek “Aftercare” izeneko programa koordinatzen du,hots, Nafarroan ezarrita dauden enpresa multinazionalak bi urtean behin bisitatzeko ekimena da.